السلام عليكم ورحمه الله وبركاته
والحمد لله رب العالمين
انا بدأت بالسلام علشان ماحدش يقول الواد ده مجنون والشتايم تبدأ على طول
اصلها بصراحه بقت اسهل حاجه دلوقتى
المهم
ندخل فى الموضوع
إحمد ربنا إنتا احسن من غيرك
إحمد ربنا إحنا احسن من غيرنا
ياعم إحمد ربنا
الكلمه دى بسمعها من ناس كتير جداً جداً جداً
وكانت سبب فى فشلى فى بعض الاشياء
بسمعها من وانا صغير
بس اللى انا عرفته مؤخراً إن مش المقصود بيها إننا فعلاً نحمد ربنا
لا
فى الغالب المصقود منها الكبت والتقليل من طموحك ودفنك
هتقولى إزاى
اقولك يا معلم
لو مثلاً بتتكلم مع حد إنك عايز تعمل مشروع علشان يبقى عندك فلوس كتير
لا لا لا من غير مشروع عاوز ربنا يكرمك "يرزق من يشاء بغير حساب" ويبقى عندك فلوس كتير
أول كلمه هتسمعها لما تقول كده لحد
ياعم إحمد ربنا إحنا أحسن من غيرنا ده فى ناس مش لاقيه تاكل
الحمد لله
بس هو أنا علشان عاوز يبقى معايا فلوس كتير ده يبقى غلط
يا أخى ماتقولى ربنا يكرمك ويديك ويبقى معاك فلوس كتير علشان فيه ناس مش لاقيه تاكل اوعى تنساهم وحاول تتبرع كده وربنا
يكرمك
وبرضه ماتنساش تحمد ربنا فى الحالتين برضه هحمد ربنا إن شاء الله
بس ليه لازم الإختيار الأول ...... يمكن أسهل
ده موقف
وفى مواقف كتير بقى لا تُعد ولا تُحصى
آخرها الثوره عندنا تيجى تتكلم على المجلس العسكرى أو الجيش نص كلمه
أول رد
يا عم إحمد ربنا إنتا ماشوفتش ليبيا واليمن وسوريا
ياعم إحنا أحسن من غيرنا
وبقى الجيش بيعايرنا انه ماضربناش
قال يعنى لو كان الجيش ضرب فينا كنا هنسكت
ليه الرد مايكونش الجيش يحمد ربنا انه ماضربش لاننا 80 مليون
مش زى سوريا حوالى 22 مليون
ولا زى اليمن حوالى 23 مليون
ولا زى ليبيا سته سبعه مليون
واحنا بقى مصريين
يبقى الجيش اللى يحمد ربنا انه ماضربش
لاننا ماكناش هنسكت
بعد كده لما حد ييجى يقولى إحمد ربنا "الحمد لله طبعا "
يقولها ومايكملش لا يقولى إنتا احسن من غيرك ولا إحنا أحسن من غيرنا
لإن الحمد لله
ولا انا أحسن من غيرى كفرد ولا إحنا احسن من غيرنا كشعب
إحمد ربنا وتطلع إلى الأفضل تصل إليه بفضل من الله
أوإحمد ربنا على ما أنت فيه ولن يضيعه منك إن شاء الله ""إحنا احسن من غيرنا""
فأيهما ستفعل ؟؟
وأيهما تفضل ؟؟